يوسف 5 (الجزء الثالث و العشرون)

#قصص_الأنبياء
#الحلقة_الثالثة_والعشرون
#قصة_يوسف(٥)
#التمكين

وقفنا المرة إللي فاتت عند إخوة يوسف عليه السلام لما راحوا مصر عشان يشتروا منها طعام،
كان يوسف عليه السلام بيشرف على أمور البيع والشراء فجاء إخوة يوسف ودخلوا عليه عشان يشتروا ،
فلما شافهم عرفهم وهم معرفهوش ، متخيلين الموقف 😳
"وَجَاءَ إِخْوَةُ يُوسُفَ فَدَخَلُوا عَلَيْهِ فَعَرَفَهُمْ وَهُمْ لَهُ مُنْكِرُونَ"
☆أنا شخصيا جربت الإحساس ده🙈
لما كنت صغيرة وكان في ناس بتعاملني بأسلوب مش ظريف، وبعدين لما لبست النقاب بقوا يعاملوني باحترام وأدب لأنهم مش عارفيني وأنا عارفاهم وكان ببقى نفسي أقولهم بس كنت بمسك نفسي😅 إحساس فظيع بصراحة😄
أكيد حصل معاكم موقف زي كده 😚

فيوسف عليه السلام اتعاد قصاده شريط ذكرياته كله...قلبه بيدق🙊

افتكر المعاملة السيئة...افتكر رميه في البئر..افتكر بيعه..بلاؤه مع امرأة العزيز ومع النسوة...السنين إللي قضاها في السجن...والسبب في كل إللي حصله ده قصاد عينه دلوقتي يقدر في لحظة ينتقم منهم👌

لكن يوسف عليه السلام معملش أي حاجة، عاملهم زي ما بيعامل باقي الناس وكان يوسف يبيع لكل واحد حِمل جمل واحد عشان التجار ميشتروش كميات كبيرة ويعلوا الأسعار على الناس،

وطلبوا منه نصيب لأبوهم وأخوهم فبدأ يتكلم معاهم ويعمل معاهم حوار بلهجة أهل مصر عشان ميعرفهوش وسألهم عن بلدهم وأحوالهم ، فقالهم السنة الجاية تجيبوا أخوكم معاكم عشان أتأكد إنكم مش كذابين، وقالهم :

إنتم مش شايفيني بزود في المكيال إزاي...مش شايفين الكرم ،

"وَلَمَّا جَهَّزَهُمْ بِجَهَازِهِمْ قَالَ ائْتُونِي بِأَخٍ لَكُمْ مِنْ أَبِيكُمْ أَلَا تَرَوْنَ أَنِّي أُوفِي الْكَيْلَ وَأَنَا خَيْرُ الْمُنْزِلِينَ"

وفي نفس الوقت خوّفهم وقال:

لو مجبتوش أخوكم معاكم المرة الجاية مش هديكم حاجة خالص😤

فقالوا له هنحاول نقنع أبونا ونجيبه😥

"قَالُوا سَنُرَاوِدُ عَنْهُ أَبَاهُ وَإِنَّا لَفَاعِلُونَ"

☆إزاي هو عرفهم وهم معرفهوش😳
لأن يوسف عليه السلام لما افترق عنهم كان صغير وهم كانوا كبار، وعلى الأقل عدت حوالي عشرين سنة على يوسف فأكيد ملامح يوسف عليه السلام اتغيرت،
وكمان هم لما دخلوا عليه كانوا ضعفاء وهو عليه هيبة الملك فهيبة الملك مخلتهمش ويبصوا له اوي ويتمعنوا في ملامحه،
ده غير كده أصلا هم عمرهم ما يتخيلوا أبدا إن يوسف يكون في المكان ده فضلا إنه يكون وزير المالية إللي سيرته انتشرت في كل مكان 😶
وكمان يوسف كان مترقب ومستني ...هو عارف إنهم هييجوا لأن القحط كان في كل البلاد فتوقع إنهم هييجوا ، وكمان كانوا عشرة فلو معرفش واحد هيعرف التاني😅
بعكس الشخص الواحد مش هيركزوا معاه أوي😉

رجع إخوة يوسف عليه السلام لفلسطين عند يعقوب ..قالوا له :إحنا اتمنع مننا المؤونة بتاعة السنة الجاية، لكن هم شرطوا علينا إننا نجيب أخونا معانا، فابعت معانا أخونا السنة الجاية عشان يرضوا يعطونا الكيل بتاعنا واحنا هناخد بالنا منه😔
"فَلَمَّا رَجَعُوا إِلَى أَبِيهِمْ قَالُوا يَا أَبَانَا مُنِعَ مِنَّا الْكَيْلُ فَأَرْسِلْ مَعَنَا أَخَانَا نَكْتَلْ وَإِنَّا لَهُ لَحَافِظُونَ"

طبعا يعقوب عليه السلام قالهم: عايزيني استأمنكم عليه زي ماستأمنتكم على أخوه يوسف قبل كده😳
فطبعا مقدروش يردوا.. هيقولوا إيه😶
ماهو هم كانوا قالوا نفس الكلام لما أخذوا يوسف عليه السلام.
"قَالَ هَلْ آَمَنُكُمْ عَلَيْهِ إِلَّا كَمَا أَمِنْتُكُمْ عَلَى أَخِيهِ مِنْ قَبْلُ فَاللَّهُ خَيْرٌ حَافِظًا وَهُوَ أَرْحَمُ الرَّاحِمِينَ"

راحوا ينزلوا الغلة إللي اشتروها من على الجمال لقوا الحاجات إللي دفعوها مقابل الأكل زي فلوس كده موجودة عندهم 😮
وكان يوسف عليه السلام أمر العمال إنه يحطوا البضاعة دي معاهم من غير ما يعرفوا عشان ميحرجهمش قصاد الناس إنه بيتصدق عليهم مثلا ولا حاجة ، وكمان شاف إن من العيب وسوء الخلق إنه ياخد فلوس من أبوه وإخوته،
فرجعها لهم وكمان خاف أحسن ميكنش عندهم غيرها فميجوش السنة إللي بعدها،
وكمان هو أراد إنه يرد الإساءة بالإحسان عشان كده بالغ في إكرامهم👌
"وَقَالَ لِفِتْيَانِهِ اجْعَلُوا بِضَاعَتَهُمْ فِي رِحَالِهِمْ لَعَلَّهُمْ يَعْرِفُونَهَا إِذَا انْقَلَبُوا إِلَى أَهْلِهِمْ لَعَلَّهُمْ يَرْجِعُونَ"

إخوة يوسف شافوا الفلوس رجعوا ليعقوب عليه السلام وقالوا له يا أبانا إحنا مش ناويين شر والدليل أهه ..الناس رجعوا لنا البضاعة بتاعتنا هناخد أخونا معانا نجيب المؤنة ونزيدها واحد ونرجع... الموضوع بسيط🤷‍♂️
"وَلَمَّا فَتَحُوا مَتَاعَهُمْ وَجَدُوا بِضَاعَتَهُمْ رُدَّتْ إِلَيْهِمْ قَالُوا يَا أَبَانَا مَا نَبْغِي هَذِهِ بِضَاعَتُنَا رُدَّتْ إِلَيْنَا وَنَمِيرُ أَهْلَنَا وَنَحْفَظُ أَخَانَا وَنَزْدَادُ كَيْلَ بَعِيرٍ ذَلِكَ كَيْلٌ يَسِيرٌ"

فيعقوب عليه السلام حس المرة دي إنهم صادقين، وخصوصا إنه خلال السنين إللي فاتت مشفش منهم حاجة وحشة وانصلح حالهم وكانوا بارين بيه فقرر إنه يستأمنهم بشرط،
قالهم عايزيني أبعته معاكم تعطوني ميثاق ..تحلفوا يعني إنكم هترجعوه لي تاني إلا لو اتزنقتم أوي ومفيش أي مجال إنكم ترجعوه،
ففعلا وافقوا وأعطوه ميثاق من ربنا وأشهدوا ربنا على العهد ده لأنهم صادقين هم مش ناويين شر فعلا😅
"قَالَ لَنْ أُرْسِلَهُ مَعَكُمْ حَتَّى تُؤْتُونِ مَوْثِقًا مِنَ اللَّهِ لَتَأْتُنَّنِي بِهِ إِلَّا أَنْ يُحَاطَ بِكُمْ فَلَمَّا آَتَوْهُ مَوْثِقَهُمْ قَالَ اللَّهُ عَلَى مَا نَقُولُ وَكِيلٌ"

عدت السنة وراح ال١١ أخ لمصر وكان لمصر ساعتها أربعة أبواب الناس بيدخلوا منها، فيعقوب عليه السلام قال لأبناؤه متدخلوش كلكم من باب واحد وادخلوا من أبواب متفرقة،
لأنهم كان عليهم هيبة وجمال ١١ أخ بالمنظر ده ممكن تصيبهم العين والعين حق،
وفعلا عملوا كده وراحوا عشان يشتروا المؤونة،
فلما دخلوا على يوسف أكرمهم وأحسن إليهم وأخد أخوه الصغير بنيامين على جنب وحكى له على إللي حصل معاه وقاله إنه هيعمل حيلة عشان ياخده معاه ويكون معزز مكرم بس ميقولهمش حاجة🤫
"وَلَمَّا دَخَلُوا عَلَى يُوسُفَ آَوَى إِلَيْهِ أَخَاهُ قَالَ إِنِّي أَنَا أَخُوكَ فَلَا تَبْتَئِسْ بِمَا كَانُوا يَعْمَلُونَ "
فلما خلاص جهزهم بالمؤونة بتاعتهم عشان يمشوا ...
فجأة لقوا حد بينادي🙋‍♂️
إنتم سارقين😡 وجايين عليهم،
فقالوا إيه إللي ضاع ..يعني مش لازم إحنا إللي نكون سرقناه يمكن ضاع😐
"فَلَمَّا جَهَّزَهُمْ بِجَهَازِهِمْ جَعَلَ السِّقَايَةَ فِي رَحْلِ أَخِيهِ ثُمَّ أَذَّنَ مُؤَذِّنٌ أَيَّتُهَا الْعِيرُ إِنَّكُمْ لَسَارِقُونَ"
فقال العمال مش لاقيين طبق الملك إللي بنكيل بيه ويُقال إنه كان من الفضة أو من الذهب،
وإللي هيجيبه هنديله مكافأة جمل محمل بالطعام، عشان يوروهم أد إيه الصواع ده مهم👌
وكان يوسف عليه السلام هو إللي وضعه في متاع بنيامين من غير ماحد يعرف،
فبدأ إخوة يوسف يدافعوا عن نفسهم ..إنتم شفتم من خلال معاملتنا إننا مش جايين نفسد في الأرض وعمرنا ما كنا سارقين،
"قَالُوا تَاللَّهِ لَقَدْ عَلِمْتُمْ مَا جِئْنَا لِنُفْسِدَ فِي الْأَرْضِ وَمَا كُنَّا سَارِقِينَ"
فقالوا لهم طيب إيه الجزاء لو كنتم كاذبين ولقينا حد فيكم معاه الصواع؟
فقالوا لهم إنكم تاخدوه عبد مقابل السرقة،
وكان في شريعة يعقوب عليه السلام إن إللي يسرق عقابه إنه يكون عبد للي سرق منه،
لكن شريعة ملك مصر إن السارق يجلد ويتسجن وبعدين يرجع لأهله،
فخلاهم هم إللي يقولوا العقوبة عشان هو عايز ياخد بنيامين👌
"قَالُوا جَزَاؤُهُ مَنْ وُجِدَ فِي رَحْلِهِ فَهُوَ جَزَاؤُهُ كَذَلِكَ نَجْزِي الظَّالِمِينَ "
وفعلا بدأوا يفتشوا في أمتعتهم واحد واحد وخلوا متاع بنيامين الآخر عشان ميشكوش في حاجة، وهم عمالين يقولوا احنا مسرقناش ويدافعوا عن نفسهم لحد ما وصلوا لمتاع بنيامين وطلعوا منه الصواع😶
"فَبَدَأَ بِأَوْعِيَتِهِمْ قَبْلَ وِعَاءِ أَخِيهِ ثُمَّ اسْتَخْرَجَهَا مِنْ وِعَاءِ أَخِيهِ كَذَلِكَ كِدْنَا لِيُوسُفَ مَا كَانَ لِيَأْخُذَ أَخَاهُ فِي دِينِ الْمَلِكِ إِلَّا أَنْ يَشَاءَ اللَّهُ "

فهنا اتصدموا 😳فراحوا على طول قالوا إن ده أخوهم من أبوهم وهو سرق لأن أخوه التاني سرق قبل كده، فهم هنا عايزين يبرأوا نفسهم،
"قَالُوا إِنْ يَسْرِقْ فَقَدْ سَرَقَ أَخٌ لَهُ مِنْ قَبْلُ "
وهنا يوسف عليه السلام غضب في نفسه لأن هو لم يسرق وهم بيتبلوا عليه وقال في نفسه والله إنتم شر الناس مكانة بعد ده كله كمان بتتبلوا علي🤦‍♂️
"فَأَسَرَّهَا يُوسُفُ فِي نَفْسِهِ وَلَمْ يُبْدِهَا لَهُمْ قَالَ أَنْتُمْ شَرٌّ مَكَانًا وَاللَّهُ أَعْلَمُ بِمَا تَصِفُونَ"
فإخوة يوسف دلوقتي في ورطة إزاي هيرجعوا لأبوهم من غير بنيامين وهم قبل كده كانوا فرطوا في يوسف،
فكلموا يوسف عليه السلام باحترام عشان يستعطفوه،
قالوا أيها العزيز ده أبوه شيخ كبير في السن وهو بيحبه جدا فخد حد فينا بداله إحنا شافينك من المنصفين السّبّاقين للخير😥

فقال لهم يوسف عليه السلام أهه إنتم قلتم إني من المنصفين فإزاي آخد واحد بريء مكان واحد مذنب ..ده كده هكون ظالم😤
"قَالَ مَعَاذَ اللَّهِ أَنْ نَأْخُذَ إِلَّا مَنْ وَجَدْنَا مَتَاعَنَا عِنْدَهُ إِنَّا إِذًا لَظَالِمُونَ"

فلما لقوا إن مفيش فايدة راحوا في جنب لوحدهم كده بعيد الناس وقعدوا يتكلموا مع بعض، فكبيرهم إللي هو اقترح إنهم ميقتلوش يوسف ويلقوه في البئر،
قال: هو إنتم مش عارفين إن أباكم خد عليكم العهد والميثاق إنكم ترجعوا ببنيامين،
إحنا مش عارفين نرجعه أهه وقبل كده ضيعتم يوسف، أنا مش همشي من البلد دي غير لما أبي يأذن لي إني أرجع وهو راضي عني، أو إن ربنا يمكّنني من إني أخذ أخويا😤
"فَلَمَّا اسْتَيْئَسُوا مِنْهُ خَلَصُوا نَجِيًّا قَالَ كَبِيرُهُمْ أَلَمْ تَعْلَمُوا أَنَّ أَبَاكُمْ قَدْ أَخَذَ عَلَيْكُمْ مَوْثِقًا مِنَ اللَّهِ وَمِنْ قَبْلُ مَا فَرَّطْتُمْ فِي يُوسُفَ"
ارجعوا لأبوكم واحكوا له إللي حصل..قولوا له ابنك سرق واحكوا إللي حصل لعله يعذركم،
وإحنا مكناش نعرف إنه سرق وسألونا إيه جزاء السارق فجاوبناهم،
واسأل الناس إللي في مصر واسأل الناس إللي كانوا معانا في القافلة وإحنا صادقين في كلامنا😔
"ارْجِعُوا إِلَى أَبِيكُمْ فَقُولُوا يَا أَبَانَا إِنَّ ابْنَكَ سَرَقَ وَمَا شَهِدْنَا إِلَّا بِمَا عَلِمْنَا وَمَا كُنَّا لِلْغَيْبِ حَافِظِينَ "
فقال لهم يعقوب لأ ..إنتم أكيد عملتم حاجة زي المرة إللي فاتت،
"قَالَ بَلْ سَوَّلَتْ لَكُمْ أَنْفُسُكُمْ أَمْرًا "
☆وده من نتائج الكذب، الشخص إللي اتعرف عنه كذب لما يقول الصدق بعد كده محدش هيصدقه🤷‍♀️
وخصوصا لو كذب وصدق بعدين نفس الموضوع،
عشان كده أهل الحديث لا ينقلوا عن أحد كذاب من الرواة حتى لو تاب👌

فقال لهم يعقوب عليه السلام أنا برده هصبر لعل ربنا يرجع لي أبنائي الثلاثة،
وأعرض عن أبنائه وهو حزين متألم حزن شديد،
وافتكر حزنه الأول على يوسف فبكى لحد ما عميت عيناه،
فقد أبناؤه الإثنين والمتهم فيهم إخوتهم...بلاء في أبناؤه كلهم😞
"وَتَوَلَّى عَنْهُمْ وَقَالَ يَا أَسَفَى عَلَى يُوسُفَ وَابْيَضَّتْ عَيْنَاهُ مِنَ الْحُزْنِ فَهُوَ كَظِيمٌ "
فقالوا له أبناؤه: إنت هتفضل تفتكر في يوسف كده على طول لحد ما تبقى ضعيف ولو الوضع استمر على كده هتموت😥
فقالهم أنا مش بشتكي لكم أنا بشكو همي وحزني لربنا وأنا عارف كويس أوي إن قدر ربنا كله خير، وعارف إن الفرج هييجي👌
"قَالَ إِنَّمَا أَشْكُو بَثِّي وَحُزْنِي إِلَى اللَّهِ وَأَعْلَمُ مِنَ اللَّهِ مَا لَا تَعْلَمُونَ"
¤طيب إزاي يعقوب عليه السلام يحزن الحزن الشديد ده وميصبرش ولا يرضى بقضاء الله مع إنه نبي😕

الحزن لا يتعارض مع الصبر والرضا، أصلا الإنسان إزاي هيحقق الصبر والرضا لو مفيش حزن🤷‍♀️ هيصبر على إيه طيب😅
فالصبر على الإبتلاء واجب يأثم إللي ميصبرش، الرضا بقى اختلفوا هل هو واجب ولا مستحب،
في علماء قالوا واجب وعلماء تانيين قالوا مستحب،
فلما تحصل حاجة للإنسان بيكرهها أو حاجة عكس إللي هو عايزها فيرضى فدي من المقامات العالية أهل الإيمان،
زي المرض والفقر والتعرض لأذى الناس.

وإيه الفرق أصلا بين الرضا والصبر😕
الصبر إن الإنسان يمسك نفسه عن التسخط والشكوى، مع إن قلبه قلقان ويتمنى لو منزلش بيه البلاء ده،
الرضى بقى هو صبر وزيادة ، يعني الإنسان الراضي مش بيتسخط ومش بيشتكي وكمان قلبه مطمئن وصدره منشرح بقضاء ربنا.
وأعلى من ده كله إن الإنسان يشكر ربنا على المصيبة أو البلاء إللي حصله ده😁
عشان هو بيشوف نعم ربنا إللي جاتله بسبب المصيبة دي، يعني يفكر إن الإبتلاء ده ربنا جعله سبب لتكفير السيئات، ورفع للدرجات، ويفكر إنه سبب في إنه يتعلم التوكل والتضرع إلى الله و...و... فهو بيشوف بعين قلبه النعم إللي في البلاء فيهون عليه البلاء ويحمد ربنا عليه😊
وده لا يتعارض مع الألم النفسي أو إن الإنسان يشتكي لله فقط👌
لأن ده حاجة طبيعية في البشر، الإنسان يتألم لوقوع البلاء وفي نفس الوقت راضي بقضاء الله، زي المريض إللي بيرضى يشرب دواء طعمه وحش، أو زي رضى الإنسان إنه يصوم في يوم شديد الحر في مقابل الأجر إللي هياخده😉

وكمان السعي لإزالة البلاء مش ضد الرضى،
يعني لو إنسان مريض ياخد علاج ، لو حد أذاكي تاخدي بأسباب دفع الأذى بدون تعدي، لو واحد فقد ابنه ياخد بالأسباب ويدور عليه وهكذا، زي ما يعقوب عليه السلام عمل👇
يعقوب عليه السلام قال لأبنائه :
روحوا شوفوا كده ودوروا على أي أخبار عن يوسف وأخيه، ومتيأسوش، خلي عندكم أمل، إللي بييأس من الفرج بتاع ربنا هم الكفار بس.
"يَا بَنِيَّ اذْهَبُوا فَتَحَسَّسُوا مِنْ يُوسُفَ وَأَخِيهِ وَلَا تَيْئَسُوا مِنْ رَوْحِ اللَّهِ إِنَّهُ لَا يَيْئَسُ مِنْ رَوْحِ اللَّهِ إِلَّا الْقَوْمُ الْكَافِرُونَ"

فعلا راح بعض أبناء يعقوب لمصر في السنة إللي بعدها ودخلوا على العزيز وقالوا له يا أيها العزيز إحنا جينا ببضاعة رديئة سيئة معندناش غيرها فأعطينا زي ماكنت بتعطينا قبل كده ...إنت عودتنا الكرم والزيادة وتصدق علينا بتحرير أخينا من العبودية...سيبه يرجع معانا😔
فهنا تكلم يوسف عليه السلام بلهجتهم هم (السريانية) وقال لهم : فاكرين عملتم إيه بيوسف وأخيه 😊
"قَالَ هَلْ عَلِمْتُمْ مَا فَعَلْتُمْ بِيُوسُفَ وَأَخِيهِ إِذْ أَنْتُمْ جَاهِلُونَ"
إخوة يوسف سمعوا اللهجة اتغيرت وحد بيقولهم عن حاجة محدش يعرفها غيرهم😲
بدأوا يبصوا للي بيتكلم ...ده العزيز...بيدققوا النظر..بيجمعوا أفكارهم ...إنت يوسف؟!!😳
"قَالُوا أَئِنَّكَ لَأَنْتَ يُوسُفُ"

قال لهم أنا يوسف وهذا أخي 💁‍♂️ ربنا من علينا بفضله 😊ودخل أخوهم عليهم لقوه مُنعّم ومُكرم وفي أبهى صورة ...ودول مصدومين🙊
وقال القاعدة النبوية عشان الإنسان يعرف يتخطى أي بلاء
من يتقي ويصبر ربنا مش هيضيعه أبدا
"إِنَّهُ مَنْ يَتَّقِ وَيَصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ "

تقوى(الخوف من الله)+ صبر =فرج من الله وفتح مبين😊
حياة يوسف عليه السلام كلها تقوى وصبر، مع امرأة العزيز تقوى وصبر(صبر على فتنة النساء)...مع النسوة تقوى وصبر...في السجن تقوى وصبر(الصبر على الظلم وأذى الناس)...
وبعد ما شاف إخوته تاني تقوى وصبر...أكثر من ثلاثين سنة تقوى وصبر، فكانت نتيجة التقوى والصبر إيه😊
ربنا فرج عنه ومكّن له في الأرض وبقى وزير، وجعل النساء يعترفن ببراءته قصاد الناس كلها،
وخلى إمرأة العزيز تعترف على نفسها قصاد الكل ،ورجّعله إخواته مكسورين معتذرين معترفين بفضل يوسف عليه السلام، ربنا لا يضيع أجر المحسنين أبدا ، وهو في أكثر من إحسان يوسف عليه السلام 👌
ربنا بيقولنا قصص الأنبياء عشان نعتبر ونقلدهم وعشان يصبرنا بيهم😊
عارفين قصة يوسف عليه السلام نزلت على رسول الله صلى الله عليه وسلم إمتى؟
نزلت وهو في مكة...في العام العاشر من البعثة، إللي سماه المؤرخون عام الحزن لأنه ماتت فيه خديجة رضي الله عنها زوجة رسول الله صلى الله عليه وسلم ومات فيه عمه أبو طالب،
فربنا بيهون على رسول الله صلى الله عليه وسلم بقصة يوسف عليه السلام، وبيهون بيها على كل مبتلى 👌
عشان كده بنحس بأُنس مع قصة يوسف عليه السلام لأنها بتعبر عننا كلنا وعن ابتلاءتنا وبتدينا أمل بالفرج،
إللي عايز ربنا يفرج عنه البلاء يتقي ويصبر،
يوسف عليه السلام وهو نبي مرسل فضل محقق التقوى والصبر ثلاثين سنة لحد ما جاله الفرج،
فما بالكم بينا إحنا😅
إحنا مش معصومين زيه فممكن منعرفش نحقق التقوى كاملة أو الصبر كامل فزمن البلاء يطول ،
ومهما طال زمن البلاء افتكروا إن غمسة واحدة في الجنة تُنسي أبأس أهل الأرض بؤسه كله ...ويؤتى بأهل البلاء يوم القيامة يُصب عليهم الأجر صبّا...فاتقي الله واصبري وارفعي نفسك للمنزلة الأعلى وهي الشكر على المصيبة والبلاء😊

إخوة يوسف عليه السلام اعترفوا بيوسف عليه السلام وبفضله ومكانته زي ما امرأة العزيز اعترفت قبل كده،قالوا :ربنا فضّلك وقربك وإحنا إللي كنا غلطانين😔
"قَالُوا تَاللَّهِ لَقَدْ آَثَرَكَ اللَّهُ عَلَيْنَا وَإِنْ كُنَّا لَخَاطِئِينَ "

قالهم إيه بقى في الموقف الرهيب ده، إللي يقدر يذلهم وينتقم منهم شر انتقام؟
قالهم خلاص حتى مش هعاتبكم ربنا يغفر لكم ويتجاوز عنكم😊
"قَالَ لَا تَثْرِيبَ عَلَيْكُمُ الْيَوْمَ يَغْفِرُ اللَّهُ لَكُمْ وَهُوَ أَرْحَمُ الرَّاحِمِينَ"
وهو ده بقى العفو عند المقدرة...تمكن منهم وخلاص هم في إيده فعفى عنهم،
مش إني أكون مغلوبة على أمري وأقول خلاص أنا هسامح عشان العفو عند المقدرة😅
ده مختلف عن ده، العفو عند المقدرة لما أكون فعلا قادرة إني آخد حقي وأذل إللي قصادي وساعتها أعفو زي يوسف عليه السلام👆
عرف يوسف عليه السلام إن أباه يعقوب أصيب بالعمى فقالهم خدوا قميصي ده وألقوه على وجه أبي بصره هيرجع له، وهاتوا الأهل كلهم وتعالوا،
"اذْهَبُوا بِقَمِيصِي هَذَا فَأَلْقُوهُ عَلَى وَجْهِ أَبِي يَأْتِ بَصِيرًا وَأْتُونِي بِأَهْلِكُمْ أَجْمَعِينَ "
ورجع إخوة يوسف لأبيهم فلما قربوا من المدينة قال يعقوب عليه السلام لأبنائه إللي كانوا موجودين معاه، أنا خايف إتتهموني إني كبرت وخرّفت بس أنا شامم ريحة يوسف،
وَلَمَّا فَصَلَتِ الْعِيرُ قَالَ أَبُوهُمْ إِنِّي لَأَجِدُ رِيحَ يُوسُفَ لَوْلَا أَنْ تُفَنِّدُونِ
فقالوا له إنت رجعت لضلالك القديم🙄
"قَالُوا تَاللَّهِ إِنَّكَ لَفِي ضَلَالِكَ الْقَدِيمِ "
بعد شوية باقي إخوة يوسف جاءوا ودخلوا ورمى واحد منهم القميص على وجه يعقوب عليه السلام فرجع له بصره ودي معجزة من معجزات الله👌
"فَلَمَّا أَنْ جَاءَ الْبَشِيرُ أَلْقَاهُ عَلَى وَجْهِهِ فَارْتَدَّ بَصِيرًا قَالَ أَلَمْ أَقُلْ لَكُمْ إِنِّي أَعْلَمُ مِنَ اللَّهِ مَا لَا تَعْلَمُونَ"

إخوة يوسف شافوا المعجزة قصادهم فقالوا لأبوهم إنه يدعي لهم ربنا بالمغفرة على إللي عملوه كله،
"قَالُوا يَا أَبَانَا اسْتَغْفِرْ لَنَا ذُنُوبَنَا إِنَّا كُنَّا خَاطِئِينَ "
فقالهم إنه هيستغفر لهم في وقت السحر في الثلث الأخير من الليل،
جاء أهل يوسف عليه السلام كلهم من فلسطين ودخلوا مصر وقرب يوسف عليه السلام أبويه وأكرمهما وأجلسهم معاه على كرسي الملك، وهنا كلهم سجدوا له😊
الأب والأم والإخوة ال١١.. الشمس والقمر وال١١ كوكب😉
"وَرَفَعَ أَبَوَيْهِ عَلَى الْعَرْشِ وَخَرُّوا لَهُ سُجَّدًا"

☆وزي ما قلنا قبل كده في قصة آدم عليه السلام إن السجود هنا سجود تكريم وتشريف مش سجود عبادة، لأن من سجد لغير الله للعبادة فده كافر، وقلنا إن ده كان في شرع إللي قبلنا لكن شريعة الإسلام مُحرم فيها حتى سجود التكريم😁

فقال لأبوه ده تأويل الرؤيا بتاعتي إللي شفتها زمان...ربنا حققهالي، وبدأ يذكر نعمة ربنا عليه وإزاي إنه أخرجه من السجن وجمعه مع أهله تاني بعد ما الشيطان كان فرق بينه وبين إخوته،
" وَقَالَ يَا أَبَتِ هَذَا تَأْوِيلُ رُؤْيَايَ مِنْ قَبْلُ قَدْ جَعَلَهَا رَبِّي حَقًّا وَقَدْ أَحْسَنَ بِي إِذْ أَخْرَجَنِي مِنَ السِّجْنِ وَجَاءَ بِكُمْ مِنَ الْبَدْوِ مِنْ بَعْدِ أَنْ نَزَغَ الشَّيْطَانُ بَيْنِي وَبَيْنَ إِخْوَتِي "
وإزاي إن ربنا لطيف بعباده وإنه إذا أراد شيئا هيأ أسبابه، يعني إزاي يوسف عليه السلام كان هيكون في المكانة إللي هو فيها دي من غير ما يعدي على كووول الإبتلاءات إللي فاتت😉
"إِنَّ رَبِّي لَطِيفٌ لِمَا يَشَاءُ إِنَّهُ هُوَ الْعَلِيمُ الْحَكِيمُ "
،فهو العليم سبحانه بمصالح العباد .
ويقال إن ما بين رؤيا يوسف عليه السلام وتحقيقها أربعون سنة، فمحدش ييأس😅
،ربنا بيدينا الأمل من خلال قصص الأنبياء وبيقولنا اصبروا وهتشوفوا النتيجة،
فلما تحققت ليوسف الرؤيا وربنا أتم عليه نعمه كلها ...دعا: يارب كما آتيتني الملك وعلمتني تأويل الرؤى ورزقتني النبوة وأصلحت لي دنياي فأصلح لي آخرتي وتوفني مسلما وألحقني بالصالحين من الأنبياء والمرسلين🤲
"رَبِّ قَدْ آَتَيْتَنِي مِنَ الْمُلْكِ وَعَلَّمْتَنِي مِنْ تَأْوِيلِ الْأَحَادِيثِ فَاطِرَ السَّمَاوَاتِ وَالْأَرْضِ أَنْتَ وَلِيِّي فِي الدُّنْيَا وَالْآَخِرَةِ تَوَفَّنِي مُسْلِمًا وَأَلْحِقْنِي بِالصَّالِحِينَ "

مفيش أي رواية من القرآن والسنة بتقول كم عاش يوسف عليه السلام، لكن أرجح اقوال المفسرين قالوا إنه عاش ١٢٠ سنة والله أعلم😊

إللي عايز يعرف باقي القصص هيلاقيها في الرابط ده كاملة
👇
https://m.facebook.com/story.php?story_fbid=10216186524989175&id=1033226288

وطبعا أي ملاحظة ياريت تقوليلي فالمؤمن مرآة أخيه😁✌

#Eman_Shalapy

#ملحوظة 😚
دي👇 سورة يوسف إصدار قديم أوي من أكتر من ٢٠ سنة للشيخ ابو بكر الشاطري ، أسلوب القراءة مختلف عن أي حد سمعته ، هو بيتفاعل جدا 

https://www.facebook.com/emy.angel.7186/videos/10215994338344629/

مع الآيات، كأنك شايفة القصة قصادك 😍