وقفنا المرة إللي فاتت على إن آدم عليه السلام نزل إلى الأرض مع حواء ليعمروا الأرض ويعبدوا فيها ونزل معاهم إبليس إختبار لآدم وذريته😊
¤إزاي بدأ الخلق يتكاثروا 🤔
كانت حواء بتولد في كل بطن أو في كل مرة توأم ولد وبنت، فالولد من البطن الأولى يتزوج من البنت في البطن الثانية ،
والبنت من البطن الأولى تتزوج من الولد إللي هييجي من البطن الثانية وهكذا 😉
لكن حرام إن الولد والبنت في البطن الواحدة يتزوجوا من بعض ويُقال إن حواء ولدت ٤٠ بطن يعني حوالي ٨٠ ذكر وأنثى كلهم تزوجوا من بعض ودي كانت بداية نسل البشر على الأرض،
آدم عليه السلام كان بيعلم أبناؤه الدين وبيعلمهم من هو الله وطبعا بيحذرهم من إبليس ،
آدم كان بشر وعنده أبناء زينا كده بالضبط حاولوا تتخيلوا الصورة معايا أب مع أبناؤه بيحبهم بيلعب معاهم... بيعلمهم ...بيراعيهم...
كان من أبناء آدم عليه السلام قابيل وهابيل،
اتولد مع قابيل أخت جميلة ، واتولد مع هابيل أخت أقل جمالا من أخت قابيل،
فالطبيعي زي ما قلنا إن قابيل يتزوج أخت هابيل وهابيل يتزوج أخت قابيل ...هو ده الشرع عندهم ساعتها.
لكن قابيل =وكان أكبر في السن من هابيل= اعترض إنه إزاي وإشمعنى ياخد أخت هابيل الأقل وهابيل ياخد أخته الجميلة😑
فكان عايز ياخد أخته لنفسه ويتزوجها هو ،
طب إزاي يابني وكده حرام وده شرع ربنا 🤦♀️
برده مصمم...زي ما بتنصحي الناس بالصح ويفضلوا مصممين على الغلط وراكبين دماغهم😑
حتى آدم عليه السلام أمره إنه يزوج أخته لهابيل
ومع ذلك برده مفيش نتيجة ، طب والحل🙄
نرجع لربنا وهو يحكم في الموضوع😊
"فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُول."
ربنا هدى آدم عليه السلام لفكرة وهي إن كل واحد منهم يقدم قربان لله،
قربان يعني حاجة يتقرب بيها إلى الله، وإللي ربنا هيتقبل قربانه هو إللي هيتزوج أخت قابيل،
"وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا"
هابيل كان بيشتغل في الرعي ، وقابيل كان بيشتغل في الزراعة، هابيل دور على أحسن وأسمن كبش عنده عشان يقربه لربنا،
وقابيل دور على أسوأ حاجة عنده وقربها لربنا،
فربنا تقبل قربان هابيل،
وكانت علامة قبول القربان أن تنزل نار من السماء تحرق القربان ده ،وبكده عرفنا مين إللي هيتزوج أخت قابيل.
"فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ."
■وقفة مهمة جدا هنا■
هابيل كان عايز حاجة ربنا يحققهاله وقابيل كان عايز نفس الحاجة لكن كل واحد فيهم قدم إللي عنده على حسب الصدق إللي في قلبه،
هابيل ضحى بأغلى حاجة عنده عشان يتقرب لربنا بيها،
وقابيل جاب أسوأ حاجة عنده مع إن هو كان عنده مجال يجيب برده أفضل حاجة...لكن معملش كده،
السؤال هنا : هل إحنا عايشين حياتنا زي هابيل ولا زي قابيل؟
هل إحنا بنضحي بأغلى حاجة عندنا في سبيل رضا ربنا،
ولا على حسب الظروف... ظروفي تسمح كان بها مسمحتش خلاص ..مش هقطع نفسي يعني🙄
هل بنستقطع من وقتنا المزحوم بأشياء ممكن تكون عادية عشان نقرأ قرآن؟
هل ضحينا بإننا نترك معصية زي النمص أو سماع الأغاني أو لبس الموضة عشان رضى ربنا وهو الغني عن العالمين؟
ولا بندور على العبادات إللي بتيجي على مزاجنا وسهلة إننا نعملها مادام مفيهاش تضحية؟
كلنا نفسنا ندخل الجنة لكن قدمنا إيه قربان عشان ربنا يرضى علينا ويدخلنا الجنة👌
سامعاكِ ياللي بتقولي احنا هندخل الجنة برحمة ربنا مش بعملنا 😅
أيوة صح هندخل الجنة برحمة ربنا ولكن زي ما قلنا قبل كده ، رسول الله صلى الله عليه وسلم يقول:
"اعملوا فكل مُيسّر لما خُلق له"👌
إسألي نفسك كده ....هل أنا زي هابيل ولا زي قابيل؟
يبأى ربنا تقبل من هابيل ...ها يا قابيل الحمد لله رضيت بأمر ربنا😅... أهه ربنا هو إللي حكم و اختار وهو أحكم الحاكمين 👌
لأ...لم يرضَ قابيل😑
وقال لآدم ربنا تقبل من هابيل عشان إنت دعيتله إن ربنا يتقبل منه ومدعتليش😤
=هااااااار😳.....يعني هو مش شايف غلطه خالص وتقصيره وبيلقي اللوم ويعلق أخطاؤه على حد تاني ...أبوه أبو الأنبياء 🤦♀️
فغضب طبعا قابيل وقال لهابيل هقتلك😡 عشان أستريح منك وعشان ما يتزوج أخته، فكان كل شوية يتوعده بالقتل،
"قَالَ لَأَقْتُلَنَّكَ"
فقال هابيل:
" قَالَ إِنَّمَا يَتَقَبَّلُ اللَّهُ مِنَ الْمُتَّقِينَ"
وكأن لسان حال هابيل يقول في رسالة لكل إنسان حاله زي حال قابيل:
"أنا ذنبي إيه تقتلني...هل ذنبي إني اتقيت ربنا وعملت إللي يرضيه عني، بتلومني عشان إنت فشلت ترضي ربنا،
طيب ليه لم تتق الله من الأول قبل ما تضيع منك الفرصة،
ليه متصلحش من نفسك...يعني هي المشكلة إني انا موجود!!!
يعني لو أنا مش موجود ربنا كان هيتقبل منك؟
النتيجة كانت هتكون هي هي لأن المشكلة عندك إنت مش عندي
ثم مش بدل ما تلومني الأَوْلى إنك تصلح غلطك وتتعلم من أخطائك،
وَجّه طاقتك دي في إنك تبني نفسك بدل ما تلوم إللي حواليك"
لكن للأسف الرسالة دي لم يستوعبها قابيل، لكن لعل حد تاني يستوعبها فالسعيد من وُعظ بغيره 👌
فلما شاف هابيل إن مفيش نتيجة راح مذكّره برابط الأخوة إللي بينهم إللي المفروض تكون سبب في التسامح والتجاوز عن الأخطاء
"لَئِن بَسَطتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ ۖ إِنِّي أَخَافُ اللَّهَ رَبَّ الْعَالَمِينَ"
فقاله لو إنت اعتديت عليّ بالقتل ظلما وحسدا فأنا مش هعاملك بالمثل...لأني أخاف الله وأكره إن ربنا يراني قاتل لأخي😔
إزاي أكون السبب في قتل أخي ....إزاي أعُق والديّ وأزعلهم 😔
مفيش نتيجة برده وقابيل مصمم على قتل هابيل😑
فهابيل استعمل آخر حاجة عنده وهو التخويف من الله ومن ناره ومن سوء المصير...
" إِنِّي أُرِيدُ أَن تَبُوءَ بِإِثْمِي وَإِثْمِكَ فَتَكُونَ مِنْ أَصْحَابِ النَّارِ "
😞بعد ده كوووله ....قابيل لسه مصمم على قتل هابيل،
منفعش الترغيب... منفعش الإستعطاف...منفعش الترهيب ...
فاضل إيه ...مفيش في إيده حاجة يعملها خلاص وكان هابيل عبدا صالحا وكان أقوى من قابيل في البنية الجسدية يعني كان يقدر يقتل قابيل لو أراد بس مرضيش لأنه يخاف الله،
فَضّل إنه يكون عبد الله المقتول ولا يكون عبد الله القاتل،
في يوم من الأيام كان هابيل نايم في المرعى ورآه قابيل والحسد كان ملأ قلبه خلاص، فجاب صخرة كبيرة =في بعض الأقوال= ورماها على رأس هابيل فقتله.
"فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ"
خسر أخوه ...خسر السند...خسر من عاش مع طفولته...خسر آخرته بعقوقه لأبويه...خسر وارتكاب أشد جريمة على وجه الأرض..القتل👌
☆شوفتم النفس الأمارة بالسوء ممكن تعمل إيه👌
زي ما النفس الأمارة بالسوء هي إللي سولت لإبليس إنه يعصي الله بعدم السجود لآدم عليه السلام😑☆
قابيل لم يتصور أبدا إنه لما يكبر ممكن يقتل أخوه،
لكن الحسد والغيرة والغضب ممكن يؤدوا إن الإنسان يعمل حاجات عمره ما كان يتخيل إنه يعملها،
الحسد ...إللي هو تمني زوال النعمة عن الغير هو أول معصية عُصي الله بها في السماء وخرج إبليس من رحمة ربنا بسببه،
وأول معصية برده عُصي الله بها في الأرض وكانت سبب في قتل نفس بغير حق👌
فمحدش يستهين بيه...بجد الحسد أخطر من السرطان ،
السرطان يأكل الجسد لكن الحسد يأكل القلب ويفسد دين الإنسان وآخرته😔
عشان كده لو حد حس بغيرة في قلبه أو حسد من ناحية أي إنسان ...يدفع الحسد والغيرة دي من قلبه بإنه يدعي للشخص ده بالبركة وإن ربنا يرزقه من فضله ويستعيذ بالله من الشيطان ويدعي ربنا إنه يطهر قلبه👌
بعد ما قتل قابيل هابيل مبآش عارف يعمل إيه😳
أول مرة حد يموت 😥
طيب عمل إيه ... حَمَل جثة أخوه على ظهره وفضل ماشي بيها فترة طويلة ...مش عارف يعمل بيها إيه
لحد ما ربنا أرسل غرابين اتخانقوا مع بعض أمام قابيل وواحد فيهم قتل التاني فالقاتل حفر حفرة عشان يدفن فيها جثة الغراب المقتول ويعلم قابيل دفن الموتى،
فَبَعَثَ اللَّهُ غُرَابًا يَبْحَثُ فِي الْأَرْضِ لِيُرِيَهُ كَيْفَ يُوَارِي سَوْءَةَ أَخِيهِ ۚ
قَالَ يَا وَيْلَتَا أَعَجَزْتُ أَنْ أَكُونَ مِثْلَ هَٰذَا الْغُرَابِ فَأُوَارِيَ سَوْءَةَ أَخِي فَأَصْبَحَ مِنَ النَّادِمِين"
فلما شاف قابيل المنظر ده تحركت فيه مشاعر الإنسانية وقعد يلوم نفسه ويعاتبها ...إزاي يكون الغراب ده وهو من أخس أنواع الطيور عرف يعمل إللي هو معرفهوش.
ندم قابيل على حمل جثة أخيه وإنه مشي بيها ولم يفعل زي الغراب،
ندم على فراق أخوه...ندم لأنه مستفدش حاجة من قتله بالعكس ده أسخط والديه...
ولكن الندم لوحده لا يرفع العقوبة لأن الندم طبيعة بشرية ...نفسنا تُسوّلنا الغلط وتزينه لينا لحد ما نقع فيه وبعدين نندم،
لكن الندم الصحيح إللي يرفع العقوبة عن الإنسان هو إللي ييجي وراه توبة صادقة ...يكون الإنسان عنده عزم أكيد إنه مش هيعمل الذنب ده تاني ويتبع السيئات دي بالحسنات زي ما قلنا المرة إللي فاتت😊
حزن آدم عليه السلام لموت هابيل... ومحدش يعرف إيه إللي حصل مع قابيل بعد كده وهل تاب بعدين ولا لأ ...وهل هو من اهل الجنة ولا من أهل النار،
كل ده العلم فيه عند ربنا...لكن إللي يهمنا إننا ناخد العبرة والعظة والخير من قصتهم، كل واحد يفكر بينه وبين نفسه هل أنا زي قابيل ولا زي هابيل 😊
إيه إللي حصل بعد كده وهل الأرض فضلت على التوحيد ؟
وهل في أنبياء بين نوح وآدم ...وهل لإبليس دور بعد موت آدم ؟
هنعرف ده الجزء الجاي إن شاء الله😁✌
ده رابط للبوست إللي فيه روابط قصص الانبياء من أول قصة آدم لحد رفع عيسى عليهما السلام👇
وطبعا أي ملاحظة ياريت تقوليلي فالمؤمن مرآة أخيه😁✌
معلش طولت عليكم المرة دي🙈
●ملحوظة مهمة تفاصيل قصة قابيل وهابيل حتى أساميهم مفيش عليها دليل صريح من أحاديث رسول الله صلى الله عليه وسلم، فالكلام إللي قلته 👆هو كلام جمهور المفسرين، وهتلاقوا في التعليقات إن شاء الله رابط القصة للي عايز يتأكد من كلامي 😘
ليست هناك تعليقات:
إرسال تعليق